វៀតណាម៖ លោក ង្វៀន ភូត្រុង (Nguyen Phu Trong) ជាមេដឹកនាំប្រទេសវៀតណាមអស់រយៈពេលជាងមួយទសវត្សរ៍បានទទួលមរណភាពហើយ នៅវ័យ ៨០ឆ្នាំ។

សូមបញ្ជាក់ថា ជាច្រើនខែមកហើយដែលលោក Trong ហាក់មានអាការៈសុខភាពទន់ខ្សោយ នៅក្នុងព្រឹត្តិការណ៍សាធារណៈនានា និងខកខានបង្ហាញមុខជាសាធារណៈទាំងស្រុងតែម្តងមួយរយៈពេលចុងក្រោយ ហើយកាលពីថ្ងៃព្រហស្បតិ៍កន្លងទៅ ភារកិច្ចរបស់លោកក្នុងនាមជាប្រធានគណបក្សកុម្មុយនិស្តវៀតណាម ត្រូវបានកាន់កាប់ដោយប្រធានរដ្ឋវៀតណាម លោក To Lam ។ សូមជម្រាបថា គណបក្សកុម្មុយនិស្តបានឱ្យដឹងនៅថ្ងៃសុក្រនេះថា លោក Trong ស្លាប់ "ដោយសារវ័យចាស់ជរា និងជំងឺធ្ងន់ធ្ងរ"។

លោក Nguyen Phu Trong បានឡើងកាន់តំណែងជាអគ្គលេខាធិការបក្សកាលពីឆ្នាំ២០១១ និងជាប្រធានរដ្ឋវៀតណាមពីឆ្នាំ២០១៨ ដល់ឆ្នាំ២០២០ ផងដែរ។ 

នៅក្នុងគោលនយោបាយការបរទេស លោក Trong បានប្រកាន់យកគោលការណ៍ "មិត្តកាន់តែច្រើន និងបន្ថយសត្រូវឱ្យតិច” ខណៈដែលលោកបានដឹកនាំប្រទេសវៀតណាមអស់រយៈពេលជាងមួយទសវត្សរ៍ ដោយមានការរួមចំណែកលើកំណើនសេដ្ឋកិច្ចយ៉ាងឆាប់រហ័សរបស់វៀតណាម ហើយថ្មីៗនេះបានដើរលើខ្សែបន្ទាត់ដ៏ល្អមួយក្នុងការលើកកម្ពស់ទំនាក់ទំនងរវាងវៀតណាមជាមួយប្រទេសចិន និងសហរដ្ឋអាមេរិក៕